چاپرښته ۲۰۲۴ - ۲۰۱۵ پښتو بائبلونه ﺍﻭ څ.ب.اِس ﺍﻭ یو.ب.اِس
۱ د څښتن ثنا او صفت وکړئ!
بختور دی هغه څوک چې کړي وېره له څښتنه
چې ډېر په خوښۍ سره مني د هغه حکمونه
۲ د هغه اولادونه به شي قوي وطن کې
او د نېکو خلکو نسل به برکت ومومي
۳ وي به شتمنه او دولتمنده کورنۍ د هغه
وي به نېکمرغه تر ابده پورې
۴ نېکانو خلکو ته ځلیږي په تیاره کې رڼا
څوک چې مهربانه، زړه سواندي او عادل اوسي
۵ بختور دی هغه څوک چې وي سخي قرض ورکولو کې
چې چلوي خپل کاروبار په انصاف سره
۶ ناکام به نه شي په هېڅ وخت کې نېک عمله سړی
نوم به یې یادیږي د همېش دپاره
۷ نه به وېریږي هغه له بد خبر څخه
ځکه چې زړه یې دی قوي، لري توکل په څښتن
۸ زړه یې ټینګ دی او نه وېریږي
هغه به ویني په رښتیا د دښمنانو ماتې
۹ په سخاوت سره کومک کړي محتاجانو سره
د هغه نېک اعمال د تل دپاره پاتې کیږي
وي به قوي او درناوی به یې کیږي
۱۰ بدکاران چې دا ګوري په قهریږي به
خپل غاښونه به چیچي او ورکیږي به دوی
ارمان به نه شي پوره د هغوی هېڅکله