چاپرښته ۲۰۲۴ - ۲۰۱۵ پښتو بائبلونه ﺍﻭ څ.ب.اِس ﺍﻭ یو.ب.اِس
۱ ای څښتنه، زه به تل ستا د تلپاتې مینې وایمه سندره
په خپله خوله ټولو نسلونو ته به ستا وفاداري بیان کړم
۲ ما ویل چې ستا مینه به شي پاتې تل دپاره
وفاداري به دې وي ټینګه اسمانونو په شان
۳ وویل تا چې ما لوظ کړی دی داود سره چې ما خوښ کړی
او خپل خادم داود سره مې کړی دا قسم دی:
۴ «اولاده ستا به کوي پاچاهي تل
ستا پاچاهي به د یو نسل نه بل نسله پورې ټینګه ساتم»
۵ څښتنه، ستا عجیب کارونه اسمانونه ستایي
د فرښتو ډله دې ستایي وفا
۶ ای څښتنه، اسمانونو کې څوک نشته ستا په شان
برابر نه دی هېڅ اسماني مخلوق د ستا سره
۷ د فرښتو غونډه کې ډېر زیات هیبتناک یې ته
د هغو ټولو نه چې ستا په شاوخوا کې دي
ته یې ډېر لوی او وېروونکی یې
۸ ای مطلق قادر څښتنه خدایه
هېڅوک نه دی زورور د ستا په شان
څښتنه، ته یې وفادار ټولو کارونو کې دې
۹ ته حکومت کوې غړمبېدونکي دریاب باندې
چې شي راپورته د هغه څپې اراموې یې ته
۱۰ ټوټې ټوټې دې کړه بلا د دریاب هم دې مړه کړه هغه
په قوي مټو تار په تار دې دښمنان کړل خپل
۱۱ دي اسمانونه ستا هم ځمکه د ستا
تا جوړه کړې نړۍ او هغې کې ټول شیان
۱۲ تا پیدا کړي دي شمال او جنوب دواړه
د تابور او حرمون غرونه
په خوشحالۍ سره ستا نوم ستایي
۱۳ ستا مټ ځواکمن دی!
زورور دی ستا لاس
ښي لاس برلاسی دی ستا!
۱۴ ستا د شاهۍ بنیاد دی پروت
په عدالت او په انصاف باندې
تلپاتې مینه او وفا د ستا په مخکې درومي
۱۵ هغه خلک بختور دي
چې عبادت کوي د ستا د خوشحالۍ په چیغو
چې تېروي ژوندون رڼا کې د احسان د ستا
۱۶ هغوی کوي خوشحالي ستا په خاطر ټوله ورځ
ستا د نېکۍ په خاطر د ستا ستاینه کوي
۱۷ ته په خپله یې د دوی جلال او قوت
راکوې مونږ ته بری په خپل احسان
۱۸ څښتن زمونږه سپر یعنې پاچا دی غوره کړی
سپېڅلي خدای د اسراییلو مونږ ته خپل پاچا راکړی
۱۹ تا ډېر پخوا خپلو وفادارو خادمانو ته رویا کې ویلي وو:
«یو جنګیالي سره مې مرسته کړې
او غوره کړی مې دی د قوم څخه
او سرلوړی کړی مې دی
۲۰ ما خپل خدمتګار داود موندلی دی
په خپلو سپېڅلو تېلو مې غوړ کړی دی
۲۱ زه په خپل لاس به هغه ټینګ ساتم
او زما مټ به هم ځواکمن کړي هغه
۲۲ کله به هم دښمنان نه شي بریالي په هغه
او بدکاران به ظلم ونه کړي په هغه باندې
۲۳ زه به مات کړم د هغه دښمنان د هغه مخکې
هغه به ووژنم چې ده څخه نفرت کوي
۲۴ زما وفا او تلپاتې مینه به وي هغه سره
زما د نوم په وسیله به شي سرلوړی هغه
۲۵ په دریاب به واک اختیار د هغه لاس ته ورکړم
ښي لاس به کړمه اوږد تر سیندونو پورې
۲۶ هغه به ماته اواز وکړي: ته زما پلار او خدای یې
هم مې ساتونکی او ژغورونکی یې ته
۲۷ ورته به ورکړم مرتبه د مشر زوی
ټولو شاهانو د نړۍ کې به یې لوړ وي موقف
۲۸ زه تر ابده خپله مینه به ساتم ورسره
او زما لوظ به وي تل ټینګ ورسره
۲۹ اولاده به یې شاهان کړم تل ترتله
ترڅو چې پاتې اسمانونه وي ساتم به یې تخت
۳۰ سرغړونه که یې وکړي اولاده زما له قانونه څخه
او چلند زما د حکمونو سره سم ونه کړي
۳۱ که چېرې دوی زما قانون مات کړي
او عمل ونه کړي په حکمونو زما
۳۲ نو دوی ته به ورکړم په کوتک د ګناهونو سزا
او د بدیو سزا به ورکړم په قمچینه باندې
۳۳ خو لاس به وانخلمه د خپلې دوامدارې مینې
زه له داوده څخه
او نه به کله ورسره بېوفایي وکړمه
۳۴ خپل لوظ به مات نه کړمه زه له هغه سره
او خپلې خبرې نه به کله هم وانه وړمه زه
۳۵ یوځل خوړلی مې قسم په خپل سپېڅلي نوم
زه به داود ته هېڅ وخت دروغ نه وایم
۳۶ وي به موجوده اولاده د هغه تل دپاره
او پاچاهي به یې تل موجوده وي
د لمر په شان زما په وړاندې
۳۷ دا به سپوږمۍ په شان تلپاتې وي
چې ده اسمان کې وفاداره ګواه»
۳۸ خو ای څښتنه، ډېر په قهر یې هغه پاچا ته
چې دې په خپله غوره کړی ؤ
او اوس پریښی او رد کړی دی تا
۳۹ تا خپل خادم سره خپل لوظ مات کړی
او غورځولی تا یې تاج په ځمکه
او هم بېحرمته کړی دی تا
۴۰ ټول دېوالونه دې د ښار رانړولي ورته
دي کلاګانې اړولې کنډوالو باندې دې
۴۱ ټول مال او جایداد یې لارویانو تالا کړی دی
ورپورې ټولو ګاونډیانو یې خندا کړې ده
۴۲ تا ورکړی دی بری دښمنانو د هغه ته
هغوی ټول دې په هغه دي خوشحال کړي
۴۳ تا پڅه کړې د هغه توره ده
نه دې جګړه کې ده ورکړې مرسته
۴۴ له منځه وړی دې دی د هغه شان او شوکت
او راویشتلی دې دی د هغه تخت په ځمکه
۴۵ خپل وخت نه مخکې دې زوړ کړی هغه
او په شرمونو دې پټ کړی هغه
۴۶ ته به ترڅو پورې خپل ځان پټوې ای څښتنه؟
ته تر ابده به خپل ځان پټوې؟
لکه د اور په شان بلیږي به ترڅو ستا قهر؟
۴۷ ته در په یاد کړه زما عمر چې دی څومره لنډ
دا هم په یاد کړه چې مونږ ټول دې بېمقصده یو خلق کړي
۴۸ څوک شي کولای چې ژوندی وي تل او هېڅ مړ نه شي؟
څوک شي کولای چې ځان بچ کړي له منګولو د ګور؟
۴۹ څه شوه څښتنه، ستا تلپاتې پخوانۍ مینه؟
هغه قسم څه شو چې تا کړی ؤ
وفادارۍ کې د داود سره تا؟
۵۰ څومره ملنډې وهي خلک ګوره ستا په خادم
دا چې زه څنګه سپکاوی د نورو قومونو زغمم
۵۱ ای څښتنه، ستا دښمنان وهي ملنډې
په هغه پاچا چې غوره کړی دی تا
چېرته چې ځي وهي ملنډې پرې
۵۲ ثنا صفت دې وي څښتن ته تر ابده پورې!
امین! امین!