د زبورونو کتاب

یوسلو دولسم زبور

د نېک سړي خوشحالي

۱ د څښتن ثنا او صفت وکړئ

بختور دی هغه څوک چې کړي وېره له څښتنه

چې ډېر په خوښۍ سره مني د هغه حکمونه

۲ اولادونه د هغه به شي قوي وطن کې

او برکت به ومومي نسل د نېکو خلکو

۳ وي به شتمنه او دولتمنده کورنۍ د هغه

وي به نېکمرغه تر ابده پورې

۴ نېکانو خلکو ته ځلیږي په تیاره کې رڼا

څوک چې اوسي مهربانه، زړه‌سواندي او عادل

۵ بختور دی هغه څوک چې وي سخي قرض ورکولو کې

چې چلوي خپل کاروبار په انصاف سره

۶ ناکام به نه شي په هېڅ وخت کې نېک عمله سړی

نوم به یې یادیږي د همېش دپاره

۷ نه به وېریږي هغه له بد خبر څخه

ځکه چې زړه یې دی قوي، لري توکل په څښتن

۸ زړه یې کلک دی او نه وېریږي

هغه به ویني په رښتیا د دښمنانو ماتې

۹ په سخاوت سره کومک کړي محتاجانو سره

پاتې کیږي تل دپاره نېک اعمال د هغه

وي به قوي او درناوی به یې کیږي

۱۰ بدکاران چې دا ګوري په قهریږي به

خپل غاښونه به چیچي او ورکیږي به دوی

ارمان به نه شي پوره د هغوی هېڅکله